"Race to Tops" kasado na

CEBU, Philippines — Andam na ang tanan alang sa giatngan nga "ELEVATE:Race to Tops 2024" cycling event nga gikatakda karong Oktubre 20.

Gipasiugdahan sa Sacred Heart School-Ateneo de Cebu Alumni Association inabagan sa 2kcares.org, Uban ta Bai’ke, ug Cocel Marketing, ang kulbahinam nga kalihukan magsugod sa Sacred Heart School-Jesuit Old Campus sa may General Maxilom Avenue ug mahuman didto sa Tops sa Barangay Busay, dakbayan sa Sugbo nga nailhan sa maanindot niining talan-awon.

Abli kini sa mga seklista nga nag-edad og 17 anyos pataas nga gustong testingan ang ilang kaugalingon ug sukdon ang ilang abilidad subay sa makutas ug tungason nga rota.

Labaw sa usa ka karera, usa kini ka selebrasyon sa komunidad, paugnat sa kusog alang sa maayong panglawas, ug pagpakabana sa kalikupan.

"The purpose of the Elevate:Race to Tops is to foster community engagement, promote fitness and wellness, and raise awareness for charitable causes.

It aims to inspire individuals to push their limits while also creating a positive impact through sports," matud pas ni SHS-AdC Alumni Association President Afshin Ghassemi.

"The main goal is to bring together participants for a challenging yet rewarding biking event that supports local charities. The event also seeks to highlight the scenic beauty of Tops Cebu, encourage a healthy lifestyle, and unite people through a shared passion for cycling and giving back to the community," dugang pa ni Ghassemi.

Bisan og usa kini ka lumba alang sa mahinungdanong kawsa, aduna gihapoy ipanghatag nga premyo ngadto sa mga category ug overall winners.

Ang rehistrasyon nagkantidad og P888 apil na niini ang race number, finisher's shirt ug medal, ug pagkaon.

Kadtong mga interesado mahimong magparehistro sa https://2kcares.org/campaigns/ o sa Core Pacific Money Exchange nga anaa mahimutang sa 4th Floor sa Ayala Center Cebu.