32nd Erne Jawad Cup mo-arangkada na
CEBU, Philippines — Ang ika-32 nga edisyon sa Erne Jawad Memorial Table Tennis Cup mosikad na karong adlawa didto sa Cebu Coliseum.
Bisan og mao na kini ang labing taas nga ping pong event sa nasud, si multi titled coach ug organizer Jessica Jawad-Honoridez nagkanayon nga ang pagpahigayon sa torneyo daw sama lang gihapon sa unang higayon matag tuig.
"Imagine, 32 years na ang Jawad Cup pero mura lang gihapon og bag-o pa.It's almost unbelievable," matud pa ni Honoridez, nga nagsilbe sab nga Cebu City Sports Commissioner.
"I had a very hectic schedule. Before and after mi nag Paris (Olympics), grabe nako ka busy gyud. Wala kaayo ko naka invite, but still daghan-daghan gyud gihapon ang nangapil," dugang pa sa University of Cebu (UC) athletic director.
Ang mga kanhi ug kasamtangang sakop sa national team gipaabot nga mowadwad sa ilang abilidad ning tulo ka adlaw nga hinapakay og bola uban ang pundok sa mga batan-on ug sumusulbong nga mga atleta.
Mga kategoriya nga kumbatihan mao ang boys/girls 13 ug 18 Under, men's ug women's open, ug executive open alang sa 45-above age group.
Duna say team events sa tanan gawas sa executive division.
Si Honoridez nanghinaut sa laing malampuson nga edisyon dili lamang sa hapsay nga dagan sa kompetisyon apan hasta sab sa paghatag og higayon sa mga players nga malab-as ang dugay nang nawala nilang koneksiyon ingon man pagdiskubre og bag-ong mga talento nga mao gyud ang buot mahitabo sa mipanaw niyang igsoon nga si Erne Jawad.
- Latest
