Ceniza nayayay ang abaga, wala makahuman og alsa

CEBU, Philippines — Ang Sugbuanong weightlifter nga si John Ceniza sayong nanamilit sa iyang debut sa Paris Olympics kay dunay gihambin nga angol sa iyang abaga.

Wala makumpleto ni Ceniza ang pag-alsa og 125 ka kilo sa snatch sa men’s 61kg. weightlifting niadtong Miyerkules sa gabii.

Duna unta siyay tulo ka mga pagsuway apan wala kini niya mabuhat.

Tungod niini, DNF kon did-not-finish ang nakatatak sa una niyang pagkumbati sa prestihiyosong torneyo nga mahitabo kausa lamang sud sa upat ka tuig.

Sa dihang nahinabi sa One Sports, si Ceniza emosyonal nga mipadayag sa nahiaguman niyang injury nga nakadiskaril sa iyang kampanya.

“Tatak kasi sa utak na may injury ka. Mahirap i-compete na hindi ka pa naka-recover. Pero nag-compete ako dahil sa Pilipinas. Lumalaban pa rin ako kahit may injury ako, lumalaban pa rin ako para sa Philippines,” dason pa sa garbo sa Barangay Pasil, dakbayan sa Sugbo.

“Sobrang… iyong adrenaline ko, sobrang taas na. Pero mas nanguna pa iyong sakit ng injury ko talaga. Kahit anong focus mo, hindi mo talaga ma-control yung sakit,” dugang pa niya.

Ang wala pag-alsa ni Ceniza og 125 ka kilo dili tipikal sa iyang kapasidad gumikan kay nakuha man niya ang 300 ka kilo atol sa IWF World Cup didto sa Thailand niadtong Abril nga naghatag kaniya og luna sa Olympics.

Sa maong kompetisyon, mirekord siya og 132 ka kilo sa snatch ug 168 ka kilog sa clean and jerk.

“Hindi talaga siya kaya ng balikat, kahit nasa taas na, biglang lumiliko yung balikat ko so hindi ko ma-control,” pasabot pa ni Ceniza.

Ang 26-anyos nga si Ceniza nangayo og pasaylo sa performance uban ang pasalig nga doblehon pa niya ang iyang paningkamot aron mokwalipikar gihapon sa sunod nga Olympics.

“Thank you po sa lahat ng sumuporta sa akin ngayong laro na ito. Pasensya po sa lahat ng Pilipino na nabigo ako ngayong Olympics pero pagsikapan ko po para mag-qualify po sa next na Olympics.”