Pinoy Lifters mokumbati na sugbuanong si John Ceniza maoy unang mobanat karong gabii

CEBU, Philippines — Ang usa ka duha ka Sugbuanong lifters nga nagrepresenta sa Pilipinas sa Paris Olympics 2024 mowadwad na sa iyang abilidad karong adlawa (Miyerkules, Agosto 7).

Si John Febuar Ceniza, 26 anyos, mo-debut sa labing engrande ug labing bongga nga pasuddayag sa paugnat sa kusog sa tibuok kalibutan pinaagi sa men's weightlifting 61kg category nga magsugod sa alas-9 sa gabii.

Ang garbo sa Barangay Pasil, dakbayan sa Sugbo nakaangkon og luna sa prestihiyosong torneyo nga mahitabo kausa lamang sud sa upat ka tuig luyo sa solido niyang performance sa 2024 IWF World Cup didto sa Thailand niadtong Abril diin siya mitapos sa ikaupat nga puwesto human mialsa og kinatibuk-ang 300 ka kilo, 132kg gikan sa snatch ug 168kg sa clean and jerk.

Sa iyang kampanya nga makapugnit og medalya, banggaon sa two-time SEA Games silver medallist ang pipila ka dekalibreng mga karibal nga naglangkob nilang Fabin Li sa China, Hampton Miller Morris sa Amerika, Sergio Massidda sa Italy, Eko Yuli Irawan sa Indonesia, ug Theerapong Silachai sa Thailand. Lain pa niyang maka-engkwentro sila si Kaimauri Erati sa Kiribati, Ivan Petkov sa Bulgaria, Mohamad Aniq Bin Kasdan sa Malaysia, Shota Mishvelidze sa Georgia, Vinh van Trinh sa Vietnam, ug Morea Baru sa Papua New Guinea.

Ang kababayan ni Ceniza nga si Elreen Ann Ando sunod nga mopakita'g aksiyon karong Huybes (Agosto 8) sa women's 59kg division.

Mao kini ang ikaduhang pagsakbang ni Ando sa Olympics.

Ang taga Barangay Carreta nga si Ando mikumbati sa 2020 Summer Games tulo ka tuig na ang milabay didto sa Tokyo diin siya nalandig sa ikapitong dapit human mialsa og kinatibuk-ang 222kg. Sa Sabado sa kaadlawon, Agosto 10, si Vanessa Sarno na sab maoy mopas-an sa mabug-at nga tahas alang sa nasud sa dihang ang 20-anyos nga Boholanang atleta moduwa sa Olympics sa unang higayon sa women's 71kg class.