GMall naka-una sa SHAABAA Division A finals

CEBU, Philippines — Ang GMall of Cebu mipakurat sa kanhi way pildeng Core Pacific Group, 61-57, aron pagposte og 1-0 nga bentaha sa ilang best-of-three Division A finals sa Sacred Heart Ateneo Alumni Basketball Athletic Association (SHAABAA) Season 27 niadtong weekend didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Si Derick Mangubat maoy nangu sa GMall uban ang 16 puntos, lima ka rebounds, usa ka steal ug usa ka assist.

Miamot si Paulsen Uy og 13 puntos samtang si Mark Sy mihipos og 11 puntos, walo ka rebounds, duha ka assists, usa ka steal ug usa ka block aron tabangan ang GMall nga makaipsot sa Core Pacific sa sikit kaarong sangka nga miresulta ngadto sa lima ka panagtabla ug siyam ka pagusab-usab sa labaw.

Ang kanhi PBA player nga si Joel Co maoy bugtong double-digit scorer sa Core Pacific bitbit ang 18 puntos, siyam ka rebounds, ug tulo ka steals.

Sa bugno alang sa ikatulong puwesto, si Hanzel Uy mikadlit og 13 puntos, lima ka rebounds, duha ka steals, ug usa ka assists sa dihang gitunaw sa 2kcares.org ang Yangtze Ice, 58-48.

Sa ubang mga duwa, ang ZLREJ Trading & Construction Batch 2010 ug Xchange Forex Batch 2018 mi-abante sa kampiyonato sa tagsa-tagsa nila ka dibisyon.

Si Gabe Branzuela mipabuto og 25 puntos ug upat ka assists samtang sila si Jasper Diaz ug Dellbert Tan nagkumboya'g 28 puntos sa dihang gitagak sa Batch 2010 ang '04 For the Win Batch 2004, 68-62, aron pagtikang sa Division B finals diin ilang banggaon ang Puresteel Manufacturing Corp Batch 2011.

Samtang sila si Errol Pastor, Jed Cedrick Colonia, ug Benedict Andre Chua misidlak sa dihang gipatikangkang sa hingpit sa Batch 2018 ang Cebu Landmasters/CloudKart Batch 2014, 61-52.

Si Pastor mitali og 13 puntos ug lima ka rebounds, si Colonia mikolekta og 12 puntos, 12 ka rebounds ug pito ka asssists samtang si Chua duna say double-double nga 11 puntos ug 12 ka rebounds alang sa Batch 2018, nga mohagit sunod sa defending champion Nest Workspaces Batch 2013 alang sa korona sa Division C.