Carlos Yulo mikab-ot sa imposibleng damgo: Milangkat og duha ka golds sa Paris Olympics

CEBU, Philippines — Sa laing kasaysayan nga wala damha sa tibuok nasudnong Pilipinhon, si Carlos Edriel Yulo mipabuhagay na sab og dalaygon nga pasundayag dayon na ngadto sa paglangkat sa ikaduha niyang sagunson nga gold medal pinaagi sa men's vault sa artistic gymnastics sa Paris Olympics 2024 niadtong Dominggo sa gabii.

Naabot kini sud lamang sa 24 oras human si Yulo mitunol sa labing unang Olympic gold sa Pilipinas sa gymnastics ubos sa floor exercise.

Mipakita og susamang kadasig ug taas nga kompiyansa, ang 24-anyos nga si Yulo mi-average og iskor nga 15.166 gikan sa duha niya ka vaults aron na ngadto sa pag-establisar og rekord uban ang ikaduha niyang bulawan nga nakapahingangha sa mga nanan-aw didto sa Bercy Arena.

Tungod niini, dungan nga giisa ang bandila ug gipatukar ang nasudnong awit sa Pilipinas sa ikaduhang sunod-sunod nga gabii ning prestihiyosong kompetisyon sa tibuok kalibutan.

Mismo si Yulo miangkon nga wala siya magdahum nga makalabni pa siya og laing gold.

“Hindi ko in-expect na ganun yung kalalabasan. 'Di talaga ako makapaniwala kanina,” dason pa ni Yulo sa usa ka interview sa One Sports. “Relax lang ako kanina kasi, parang ‘Sige, kahit ano na to, walang mawawala sa akin, all out na to.’ Ganun na po yung feeling ko kanina.”

Human sa naglagiting niyang kalamposan, gipaabot nga magbaha ang insentibo ni Yulo.

Alang sa kaluha niyang golds, si Yulo makakubra og P50 million nga insentibo gikan sa kagamhanan ug sa Manny V. Pangilinan Sports Foundation, usa ka upgraded condominium unit gikan sa Megaworld nga mibalor og P32M uban ang P3M bonus, ug house and lot sa Tagaytay City kortesiya ni Philippine Olympic Committee (POC) President Abraham Tolentino.

Daghan pa unya ang madawat nga mga gasa ni Yulo.

Angayan lamang kini alang sa labing bangiitan nga Pinoy Olympian sa tanang panahon.