Sugboanong champion racer mapasalamaton ni Mayor Diamante

CEBU, Philippines — Ang bangiitan nga Sugboanong rider nga si Christwil Villanueva mi-courtesy call ni Tuburan Mayor Aljun Diamante ning bag-ohay pa lamang aron personal nga ipadangat ang mainiton niyang pasalamat ngadto sa usa sa labing dako niyang tigpaluyo nga nakatabang og dako sa kalamposan nga iyang nakab-ot ning tuiga.

Si Diamante, pinaagi sa iyang Tuburan Coffee ug Tuburan 360 Resto and Sunset View Deck, misuporta ni Villanueva sa tanan niining mga lumba karong tuiga.

Nakapadasig kini ni Villanueva nga ihatag ang labing maayo niyang abilidad sa matag kompetisyon.

Tuod man, si Villanueva midominar sa nag-unang tulo ka hugna ubos sa 300cc category sa 2024 Petron Pirelli National Motorcycle Racing Championship didto sa Clark International Speedway sa Mabalacat, Pampanga.

Si Christwil, kauban ang amahan niyang si Wilson Bas Villanueva nga usa sab ka tinamod nga personalidad sa Cebu sports, mapasigarbuhon nga mipresenta sa iyang mga tropeyo ngadto ni Diamante agi'g pagpadayag sa iyang pagpasalamat sa amahan sa Tuburan sa tanan niining suporta.

Bitbit ang 150 puntos, si Villanueva maoy nag-una sa malisud nga karera alang sa overall title padung sa Round 4 ning unom ka hugna nga kompetisyon karong     Agosto 3-4.

Usa ka triathlete ug basketball varsity player sa wala pa mopokus sa hingpit sa motorsport nga labing duol sa iyang dughan, si Villanueva usa sa mga gipasidunggan sa 38th Sportswriters Association of Cebu-San Miguel Beer (SAC-SMB) Cebu Sports Awards niadtong Mayo.