SSL National Invitationals crown idinagdag ng NU sa koleksyon

MANILA, Philippines — Kahit kulang sa sandata ang National University Lady Bulldogs ay nanatili ang tikas ng mga ito sa labanan.

Noong Martes ng gabi ay muli silang nakoronahan matapos nilang kalusin ang Far Eastern University Lady Tamaraws sa Game 2 ng 2024 Shakey’s Super League (SSL) National Invitationals best-of-three finals na nilaro sa Ninoy Aquino Stadium sa Manila.

Umahon ang reigning UAAP champion NU sa 1-2 set match win, pero dahil may dugong kampeon ay kinalawit nila ang dalawang sets na natitira para makuha ang titulo.

“I must say that the NU volleyball program established the right formula from high school to college. Though it’s not always perfect, pero mayroon naman results na naa-achieve,” ani Lady Bulldogs coach Norman Miguel.

Ipinakita ng Lady Bulldogs ang kanilang tatag sa dikdikang labanan sa event na suportado ng Shakey’s Pizza Parlor, Eurotel, Victory Liner, Team Rebel Sports at Mikasa.

Pinamunuan ni Most Valuable Player Bella Belen ang kanyang teammates upang akbayan ang Lady Bulldogs sa kampeonato.

Dahil sa tagumapy ng NU, naidagdag ng Lady Bulldogs ang National Invitationals title sa kanilang back-to-back Collegiate Preseason Championship wins.

“Honestly sobrang saya na umabot kami sa finals then nag-champion kami. Actually, yung preparation namin dito medyo shaky pa kasi alam naman namin na most of my players ga-ling sa out of the country, sa South Korea, tapos pagbalik dito five days lang kami nag-prepare and then may tournament na kami,” ani Miguel.

Nahirang din si Belen na 1st Best Outside Spiker kasama ang teammates na sina Lams Lamina (Best Setter) at Shaira Jardio (Best Libero) na mga nakakuha rin ng individual awards.