Central Visayas mihirit og gold sa football nalandig sa ikalimang puwesto sa 64th Palaro

CEBU, Philippines — Gisilyohan sa Central Visayas ang ilang kampanya uban ang bulawanong performance sa football sa dihang ang rehiyon mitapos sa ikalimang dapit sa pagkahuman sa 64th Palarong Pambansa kagahapong adlawa.

Gilangkoban og mga players gikan sa Don Bosco Technical College (DBTC)-Cebu, ang Region VII milampornas sa Calabarzon, 3-0, sa ilang sangka sa kampiyonato didto sa Dynamic Herb-Borromeo Sports Complex didto sa South Road Properties aron langkaton ang gold medal sa elementary boys football event.

Bisan tuod og ang tibuok team nagtambayayong pagkab-ot sa gihandum nilang kamaposan, si Mateo Empleo misidlak nga labing hayag sa kampo sa mga Bosconians human milansang og duha ka sagunson nga goals nga nagtuboy sa Central Visayas ngadto sa impresibo niyang pagpayaka sa mga bisita gikan sa Region IV-A.

Human naka-iskor sa naghinapos nga bahin sa first half, si Empleo mipaslak og laing goal sa sa ika-30 nga minuto.

Si Zachary Fernandez ang mikadlit sa katapusang goal pipila ka minutos na lamang ang nahibilin sa dili pa mahuman ang duwa.

“I’m very happy, thanked God! The boys did really well. Mas kusog gani tong Western Visayas yesterday in the semifinals and we did it so I also expected them to perform well,” matud pa ni coach Glenn Ramos. “I told the boys last night, we have to win this one. We are the host and we want to show to the Cebuano community that we are No.1 and we did it!”

Sa overall standings, ang Central Visayas nalandig sa ikalimang puwesto bitbit ang 29 ka golds, 42 ka silver, ug 39 ka bronze. Ang National Capital Region (NCR) nagpabiling kampiyon sa ika-17 nga sagunson nga edisyon uban ang 98-66-74 gold-silver-medal bronze tally.

Ang Calabarzon (57-51-53) mahimutang sa halayo nga ikaduhang dapit ug gisundan kini sa Western Visayas (56-41-41) ug Davao Region (32-25-35).

Naglangkob sa top 10 ang Central Luzon (25-37-45), Eastern Visayas (18-14-22), Socsksargen (17-23-31), Northern Mindanao (14-27-43), ug Bicol Region (14-15-20).