Shangri-la, Seda mag-abot sa HRACCI basketball final

CEBU, Philippines — Ang Shangri-la Mactan Cebu ug Seda Central Bloc nag-agi og managlahi nga dalan sa wala pa gitagak ang tagsa-tagsa nila ka mga karibal aron pag-abante sa kampiyonato sa basketball sa Hotel Resort and Restaurant Association of Cebu, Inc. (HRRACI) Sportsfest 2024 didto sa Capitol Parish Gym sa may dalan Escario, dakbayan sa Sugbo.

Ang Shangri-la nanglimbasog hangtud sa hilimatyong segundos sa sikit kaayong duwa sa wala pa miposte og makutas nga daog, 71-69, batok sa JPark Island Resort sa semifinal.

Si Jose Miguel Tabaloc misidlak nga labing hayag sa Shangri-la uban ang double-double nga 21 puntos ug 19 ka rebounds nga iyang gipalamanan og upat ka assists ug susamang gidaghanon sa steals.

Impresibo sab si Jonathan Canceran nga mibahug og 19 puntos,  pito ka rebounds, tulo ka assists ug duha ka steals alang sa Shangri-la nga milukat og ticket sa final batok sa Seda Central Bloc, nga mi-abante  human gidemolis ang Kandaya Resort, 94-66, sa laing sangka sa semis.

Si Steve Castro ang bida sa Seda bitbit ang 19 puntos, walo ka rebounds, siyam ka assists, ug lima ka steals.

Miamot si Renzo Galdo og 14 puntos ug pito ka rebounds, sila si Marcus Fuentes ug Roger Caytuna mi-iskor og 12 puntos matag usa, samtang si Adrian Padilla midonar og 10 puntos, duha ka rebounds, ug pito ka assists sa balanseng ataki sa Seda.

Ang Seda ug Shangri-la magtige sa titulo karong Hulyo 21.