Makinano nanghawod sa 2nd CEPCA-Rey Gealon chessfest
CEBU, Philippines — Ang beteranong player nga si Anthony Makinano midugang og laing tropeyo sa ilang koleksiyon human gidominar ang 2nd Cebu Executives and Professionals Chess Association (CEPCA)-Councilor Rey Gealon Open Chess Tournament niadtong Domingo, Hunyo 30, didto sa Cebu Chess Club nga anaa mahimutang sa 4th floor sa Robinsons Galleria Cebu.
Gihuman ni Makinano ang siyam ka hugna nga kompetisyon bitbit ang labing taas nga 8.0 puntos aron sakmiton ang korona nga nagtangag og P7,000 nga ganti kortesiya ni Cebu City Councilor Atty. Rey Gealon ug CEPCA President Engr. Jerry Maratas.
Sila si Mark Kevin Labog ug Arena Grandmaster Michael Joseph Pagaran parehong miposte og 7.5 puntos apan si Labog ang mipahiluna sa ikaduhang dapit gumikan sa taas niyang tiebreaker. Si Labog mibulsa og P5,000, samtang si Pagaran nakadawat og P3,000.
Sila si Ariel Joseph Abellana, Michael Pinar, Ruel Nuttal, Jhulo Goloran, ug Stephen Nazareno, Jr. ang mi-okupar sa ikaupat ngadto sa ikalimang puwesto bitbit ang 7.0 puntos matag usa.
Sila si Ian Villareal, Jervy Villarin, ug Edelyn Vosotros nalandig sa ikasiyam ngadto sa ika-11 nga dapit uban ang 6.5 puntos, samtang sila si Chris Aldritz Pondoyo, Arjayl Martel, Isagani Luna Jr., ug Jave Mareck Peteros maoy nagkumpleto sa top 15 uban ang 6.0 puntos.
Sa laing bahin, ang top players sa tagsa-tagsa nila ka mga kategoriya mao sila si Ruel Nuttal (Cepcans A), Leo Cortes (Cepcans B), National Master Carlos Canbuenos (senior 60-above), Edelyn Vosotros (female), Jerry Villarin (Under 22), Sean Kenneth Cogonon (Under 16), Marquis Angelo Mallorca (Under 12), ug Theon Cade Miranda ug Danica Jolly Lavandero (Under 10).
- Latest
