Avellaneda nagsulong ng 3 ginto
ZAMBOANGA CITY, Philippines — Kumulimbat ng tatlong gold medal si Philippine Navy cadet Hanna Claire Avellaneda sa women’s chess sa ginaganap na 2nd Philippine ROTC Games 2024 Mindanao Qualifying Leg dito.
Niratsada ng 20-anyos na si Avellaneda ang mga ginto sa standard, rapid at blitz events na inilaro sa Western Mindanao State University.
Ayon kay Avellaneda, isang 3rd-year Bachelor of Science in Marine Transportation student sa Zambonga State College of Marine Sciences and Technology, hindi niya akalain na magkakampeon siya sa tatlong event sa chess dahil magagaling din ang kanyang mga nakalaro.
“Sasali po ako sa National Finals sa Indang, gagawin ko po ang lahat para manalo, alam ko pong mas magagaling ang makakalaban ko,” saad ni Avellaneda.
Hindi rin nagpadaig si Shaina Jane Isnani ng Mindanao State University-Sulu para sa Philippine Air Force para pagwagian ang standard, rapid at blitz event.
Nasungkit naman ni Philippine Army bet Jessa Corpus ang pang-apat na gintong medalya matapos makipagtulungan kina Emily Omapia, Angelie Barete at Ronalyn Suson sa 4x400 relay na itinakbo sa Joaquin Enriquez Memorial Sports Complex track oval.
Samantala, bumilib naman si Philippine Sports Commission (PSC) chairman Richard Bachmann dahil sa pagdami ng mga atletang lumahok sa ROTC Games sa Zamboanga.
- Latest
