SHAABAA Season 27 batch 2013, Core Pacific Group,  2KCares.Org gisubhan og daog

CEBU, Philippines — Si Rendell Senining mitagak og 21 puntos uban ang walo ka rebounds, usa ka assist, ug usa ka steal sa dihang giablihan sa Nest Workspaces Batch 2013 ang pagdepensa sa ilang korona pinaagi sa 61-51 nga pagpakaging sa Cebu Landmasters/CloudKart  Batch 2014 sa Division C sa Sacred Heart Ateneo Alumni Basketball Athletic Association (SHAABAA) Season 27 niadtong Dominggo, Hunyo 2, didto sa Magis Eagles Arena sa Sacred Heart School-Ateneo de Cebu (SHS-AdC) sa Brgy. Canduman, dakbayan sa Mandaue.

Mihimo sab og kasikas si Fletcher Galvez uban ang 14 puntos, 17 ka rebounds ug upat ka blocks ingon man si Emman Malazarte nga midugang og 12 puntos alang sa Batch 2013.

Sila si Jair Igna, Popoy Navarro, ug Lucky Ecarma nagkumbinar og 38 puntos alang sa pilderong Batch 2014.

Sa laing bahin, si Uriel Avila mipaulbo og 32 puntos, 14 ka rebounds, siyam ka steals, lima ka assists ug duha ka blocks sa dihang gilampornas sa Bright Lights N' Style Batch 2022 ang CSAS Batch 2024,  65-45.

Sa ubang mga duwa sa Division C, ang FADI Batch 2021 mipayaka sa Global Star Motors Batch 2020, 60-50, samtang ang Batch 2018 milampaso sa Batch 2023, 85-69.

Sa Division A, ang Core Pacific Group ug ang 2KCares.Org, ang duha ka teams nga gipaluyohan ni SHAABAA chairman Afshin Ghassemi, misikad sab sa ilang kampanya pinaagi sa usa ka masipang  buto.

Si Joseph Rudolf Lo mitali og 11 puntos, walo ka rebounds, tulo ka blocks, usa ka assist, ug usa ka steal sa dihang gipiog sa Core Pacific ang GMall of Cebu, 66-60, samtang si Sean Young mipupo og 13 puntos ug tulo ka rebounds aron pangulohan ang 2KCares.Org ngadto sa 47-29 nga demolisyon sa Yangtze Ice.

Sa Division B, si Erwin Lopena miharos og 30 puntos, 11 ka rebounds, pito ka assists, ug duha ka steals samtang si Franco Te mitali og 23 puntos, 15 ka rebounds, upat ka assists, ug lima ka steals aron ituboy ang 04 The Win Batch 2004 Batch 2004 ngadto sa 93-62 nga pagkastigo sa  Insular Square Batch 2005.

Si Bernard Chioson mipabuhagay og 31 puntos, 12 ka rebounds, ug unom ka assists sa dihang gibugha sa Puresteel Manufacturing Batch 2011 ang ZeroNine Batch 2009, 95-53, samtang si Jasper Diaz mikolekta og 22 puntos, 17 ka rebounds, duha ka blocks, ug usa ka assists aron tabangan ang ZLREJ Trading & Construction Batch 2010 pag-ipsot ngadto sa 53-50 nga kadaogan batok sa Subtero Batch 2006.