NBA mi-imbestigar sa igsoon ni Jokic

CEBU, Philippines — Ang NBA mipahigayon og imbestigasyon kabahin sa insidente diin si Strahinja Jokic, maguwang ni Denver Nuggets star Nikola Jokic, nakugmag og usa ka fan human sa kadaogan sa Denver niadtong Martes.

Sigun sa taho sa TMZ ug The Athletic nga gisusi na karon sa liga ang maong matang, nga nahitabo pipila lamang ka minutos human ang Nuggets madasigong mibangon gikan sa 20 puntos nga pagkalubong aton patikalbong ang Lakers, 101-99.

Ang buzzer-beater ni Jamal Murray maoy nagtuboy sa Nuggets ngadto sa kulbahinam nga daog.

Human niini, sila si Strahinja ug Nemanja Jokic, mga maguwang ni Nikola, mikompronta sa duha ka mga tawo nga nagtan-aw sa duwa didto sa Ball Arena sa Denver, Colorado.

Makita nga si Strahinja daw milabay og kumo nga na-igo sa ulo sa usa ka fan.

Matud pa sa TMZ nga gi-imbestigahan na sa Denver Police Department ang insidente apan hangtud karon wala pay biktima nga mipatim-aw sa maong hitabo.

Ang mga igsoon in Jokic anaa kanunay sa courtside sa mga duwa sa Nuggets apan lagmit maputol kining benepisyo kon ugaling mapamatud-an sila nga sad-an sa dili maayong binuhatan.

Si Nikola Jokic miharos og 27 puntos, 20 ka rebounds, ug 10 ka assists sa dihang ang Nuggets miposte og 2-0 nga bentaha batok sa Lakers sa ilang best-of-seven NBA playoff first-round series nga magpadayon karong Biyernes didto sa Los Angeles.