Thunder nakaipsot sa Pelicans

CEBU, Philippines — Si Shai Gilgeous-Alexander milansang sa krusyal niyang basket sa pinal nga 32.5 segundos aron agakon ang Western Conference top seed Oklahoma City Thunder ngadto sa kulbahinam nga daog,94-92, batok sa New Orleans Pelicans sa unang hugna sa NBA playoffs kagahapong adlawa.

Pipila ka oras human siya ginganlan nga finalist alang sa MVP award ning NBA season uban nilang Nikola Jokic sa Denver Nuggets ug Luka Doncic sa Dallas Mavericks, si Gilgeous-Alexander mikadlit og 28 puntos aron pangulohan ang Thunder sa usa ka impresibong salida nga gikahimuot sa bagang panon sa ilang fans didto sa Paycom Center sa OKC. Sa ubang resulta, ang Boston Celtics, Milwaukee Bucks ug Los Angeles Clippers miposte og dominanteng kadaogan batok sa tagsa-tagsa nila ka mga karibal.

Si Jayson Tatum mirehistro sa labing una niyang triple-double sa playoffs uban ang 23 puntos, 10 ka rebounds ug 10 ka assists aron pangulohan ang Celtics ngadto sa 114-94 nga paglampaso sa Miami Heat.  Didto sa Milwaukee, si Damian Lillard mibomba sa tanan niyang 35 puntos sa first half diin ang Bucks miposte og 69-42 nga labaw  dayon na ngadto sa paglampornas sa Indiana Pacers, 109-94.

Sa Los Angeles, si James Harden mikadlit og 28 puntos uban ang walo ka assists samtang sila si Paul George ug Ivica Zubac nagkumboya'g 42 puntos sa dihang gimakmak sa Clippers ang Dallas Mavericks, 109-97.