1st CVR7 Basketball League gitakda

CEBU, Philippines — Ang Central Visayas Region sa Fraternal Order of Eagles (Philippine Eagles) nga gipangulohan ni regional governor Joseph James Cornejo mopahigayon sa labing una nilang CVR7 Basketball League nga giulohan og "Kuya Roel "Boy" Del Socorro Cup" ug gikatakdang mosikad karong Abril 27 didto sa Baller Capital sa Barangay Subangdaku, dakbayan sa Mandaue.

Si league commissioner Adrian Dy nagkanayon nga 10 ka teams ang mopakita'g aksiyon sa torneyo nga giorganisa sa AMC Sports League inabagan sa Cebu MTC, Sunsport, Hype Pro Cebu, ug Epson.

Ang mga koponan nga mokumbati ubos sa Eagles nga kahugpongan mao ang Habagatang Sugbo, New Cebu Integrated North, Consolacion Cebu Integrated North, South Mandirigma, Habagatang Sugbo Nagahugpong, South Maliksi, Sugbuanong Maharlika, Madasigon Integrated North, Sugbu Supremo Integrated North, ug Habagatang Sugbo Tagaytay.

Gibahin sa duha ka grupo, moduwa sila og single round robin sa eliminasyon.

Ang upat ka teams matag bracket mo-abante sa playoffs diin ang top 2 adunay twice-to-beat nga bentaha. Ang mga mananaog molahos sa semifinals ug dayon sa kampiyonato.