Pleasant, SSN kampiyon sa 5v5 B-League Season 1

CEBU, Philippines — Ang Pleasant team ug SSN milugwa nga kampiyon sa tagsa-tagsa nila ka mga kategoriya sa labing unang 5v5 B-League season nga giorganisa ni Kim Abellar didto sa Duljo Fatima Sports Complex II Gym sa dakbayan sa Sugbo.

Gipakaging sa Pleasant ang Lalis, 34-30, aron langkaton ang titulo sa 14 Under division.

Si Gerald Igot ang bida sa Pleasant uban ang 13 puntos nga iyang gipalamanan og unom ka rebounds, tulo ka steals, ug duha ka blocks hinungdan sa pagbayaw kaniyang Finals Most Valuable Player.

Ang ubang miyembro sa Pleasant mao sila si Juanito Vapor, Angelo Racho, Kenney Dempaso, ug Enzo Pitogo.

Si Niño Baluntang mihipos og 14 puntos sa pilderong Lalis.

Sa laing bahin, ang SSN mikastigo sa BP Hardwarriors, 30-21, aron birahon ang korona sa Under 17.

Si Luiz Gonzales maoy nangu sa SSN  bitbit ang 10 puntos, pito ka rebounds, tulo ka steals, ug upat ka blocks. Tungod niini, siya maoy gipasidunggan nga Finals MVP.

Mga kauban ni Gonzales pagdimdim sa tam-is nga kalamposan sila si Vince Denwel Godofredo, Chris Nazariene Solon, Joel Miñao Jr., ug Ronniel Montalban. Si Hamza de los Angeles adunay siyete puntos sa naminghoy nga BP Hardwarriors.