Sibonga daog na gyud sa Cabaron Cup

CEBU, Philippines — Sila si James Martin ug Ehman Janson Suarez nagkumboya'g 76 puntos sa dihang gibuntog sa Sibonga ang Alcantara, 113-105, alang sa una nilang daog sa Mayor Inocentes Cabaron Inter-town Invitational Basketball Tournament niadtong weekend didto sa Moalboal covered court.

Si Martin mipaulbo og 44 puntos samtang si Suarez mitali og 12 sa iyang 32 puntos sa ikaduhang kuwarter  sa dihang gipakgang na gyud sa Sibonga ang tulo ka sagunson nilang malas.

Mitagak si Martin og 15 puntos sa nag-unang 10 minutos sa aksiyon ug dayon mibubo og 16 puntos sa ikatulong kuwarter aron tabangan ang Sibonga pagpapas sa 57-65 nilang alkansi sa halftime ug ilogon ang labaw sa katapusang kuwarter sa hingpit.

Si CJ Ypanto mitapos uban ang 27 puntos, si Rutchien Libato mi-iskor og 24, samtang si JC Ypanto miposa og unom ka 3-pointers sa iyang 20 puntos apan nakawang ang ilang paningkamot gumikan kay ang bokya pang Alcantara nasugamak sa ikaupat nilang sunod-sunod nga pilde.

Sa laing bahin, ang Aloguinsan mikatkat sa ikaduhang puwesto sa Group A human gilampaso ang Ronda, 105-81.

Si Andre Caminos maoy nangu sa Aloguinsan bitbit ang 21 puntos.