NU, La Salle-Lipa nagsosyo sa liderato sa Pool B
MANILA, Philippines — Nagsosyo sa top spot ang National University at De La Salle-Lipa matapos manaig sa kanilang mga kalaban sa Philippine National Volleyball Federation (PNVF) Under-18 Championship women’s division kahapon sa Rizal Memorial Coliseum.
Sinagpang ng Lady Bullpups ang Parañaque City, 25-4, 25-16 habang giniba ng La Salle-Lipa ang San Juan Institute of Technology-Batangas, 25-17, 25-19, sa 12-team women’s division.
Parehong may 2-0 record ang NU at La Salle-Lipa sa Pool B at may natitira pang dalawang laro sa single-round elims.
Sa Pool A, tinalo ng Maryhill College-Lucena (1-0) ang Limitless Sports Center (0-2), 25-18, 25-19, at pinadapa ng Gracel Christian College (1-0) ang La Salle-Zobel, 25-22, 25-21.
Tabla sa liderato ang Maryhille College-Lucena, Gracel Christian College at Santo Tomas sa Pool A sa magkakapareho nilang 1-0 baraha.
May 1-1 marka ang Montessori School matapos ang 25-10, 25-9 pagdaig sa Limitless Sports Center noong Sabado.
Magbabalik ang unang youth tournament ng PNVF na pinamumunuan ni president Ramon “Tats” Suzara sa April 5 bilang pag-obserba sa Holy Week.
Ang top four teams sa bawat pool ang papasok sa quarterfinals na isang knockout format patungo sa semifinals at championship para sa PNVF youth crown.
- Latest