Mapua Lady Cardinals kumapit sa No. 4 spot
MANILA, Philippines — Nagtulungan sa opensa sina Roxie Dela Cruz at Raissa Janel Ricablanca upang igiya ang Mapua University sa 21-25, 25-19, 26-28, 25-16, 15-13 panalo kontra Lyceum of the Philippines sa NCAA Season 99 women’s volleyball tournament kahapon sa Filoil EcoOil Centre.
Tumipa si Dela Cruz ng 20 points, habang 18 ang kinana ni Ricablanca para sa Lady Cardinals na kumapit sa No. 4 spot sa team standings kasalo ang Arellano Lady Chiefs tangan ang 5-3 record.
Napalaban nang todo ang Lady Cardinals at naungusan sila ng Lady Pirates ng isang set, 1-2, mabuti at nanatili ang kanilang tikas kaya nasikwat ang huling dalawang frames.
Tumulong sa opensa sina Alyana Nicole Ong at Nadine Angeli Berces na nagtala ng 16 at 13 markers, ayon sa pagkakasunod, at anim ang ambag ni Princess Jolina Barbiera.
Nalasap naman ng Lyceum ang pangalawang talo sa walong salang pero nanatili sila sa second spot ng team standings.
Bumira si Johna Denise Dolorito ng 25 markers na galing lahat sa spikes pero hindi sapat upang itawid sa panalo ang Lyceum.
May pareho namang 18 points sina Janeth Tulang at Joan Doguna para sa Lady Pirates.
- Latest
