Wenceslao nakampiyon luyo sa bag-ong paglaom nakakuha'g inspirasyon gikan sa mga dunay apan sa kinabuhi

CEBU, Philippines — Siyam ka tuig ang miagi, si Rodel Wenceslao mibiya sa yuta niyang natawhan didto sa Kananga, Leyte aron gukdon ang iyang damgo isip usa ka boksingero dinhi sa Sugbo.

Siyam ka tuig ang milabay, mibalik siya nga usa ka kampiyon.   

Uban ang malipayong kasingkasing, si Wenceslao mipresenta sa iyang World Boxing Foundation (WBF) Australasian welterweight belt isip regalo ngadto sa iyang mga gininakanan nga sila si Rodolfo ug Jovita nga taud-taud na sab niyang wala igkita.

Si Wenceslao misakmit sa WBF regional title pinaagi sa 6th round TKO batok sa kababayan niyang si Ernie Sanchez sa General Santos City atol sa "Engkwentro 12:Binombahay sa Cawayan" sa ARQ Sports Promotions niadtong Marso 8 didto sa Cawayan Sports Complex sa Masbate.    

"Lipay gyud kaayo ko karon," matud pa sa 30-anyos nga si Wenceslao. "Wala ko mag-expect nga ma-champion pa ko kay tungod lagi sa sitwasyon sa akong boxing record. Mura'g tsambsa-tsamba na lang pa pero na-champion pa gyud tawon ko tungod sa akong paningkamot."

Si Wenceslao nagsugod og pamuksing sa edad nga 15 anyos apan kay wala magiyahi og ensakto sa usa ka manedyir, malisud ug mapit-os nga dalan ang niyang giagian.

Dayon iyang nakaplagan ang ARQ Gym duha ka tuig ang milabay.

Tungod sa tabang nilang trainer Eldo Cortes ug conditioning coach Roger Justine Potot nga midupa sa iyang kakugi ug determinasyon, si ARQ big boss Jason Arquisola miahatag ni Wenceslao og usa ka bulawanong oportunidad nga dili niya mahikalimtan.

Sa dihang misud siya sa ARQ Stable niadtong Marso 2022, si Wenceslao nagbitbit og negatibong rekord kat mas daghan pa ang iyang pilde (19) kay sa iyang daog  (14).

Apan misubay og tarong sa bag-o niyang direksiyon, ang gibansagan nga "The Hulk" miharos og pito ka sagunson nga daog ubos sa ARQ aron inaton ang iyang baraha ngadto na sa 21-19-2 uban ang 10KOs.

"Dako kaayo ko og pasalamat sa ARQ ilabi na ni sir Jason Arquisola kay dili pa tungod nila, dili ko ma-champion karon," dason pa ni Wenceslao.

"Sa pagka karon, kutob nalang sa akong maabot maoy akong abton," padayon pa niya."Pero kung matagaan ko og chance na makaduwa og world title fight sa umaabot mas maayo. Trainingan gyud nako ni og maayo."

Nanghinoklog sa iyang kalamposan, si Wenceslao mipaambit nga mo-undang na gyud unta siya sa pamuksing tungod kay nadismaya sa dagan sa iyang karera nga gitiwasan pa sa pandemiya. Apan nakakaplag siya og paglaum niadtong mga tawo nga dunay apan sa kinabuhi pero padayong nanglimbasog taliwala sa pisikal ning kakulian.

"Nihunong naman gyud unta ko og boxing atong panahon sa pandemic pero sa kadugayan nakahukom ko nga mobalik," padayag pa ni Wenceslao. "Ang naka-inspire nako kanang makakita ko og buta ug bakol or pungkol kay wala man gani ni sila nahutdan og paglaom sa kinabuhi ako na ba kaha nga kumpleto ang lawas."