Irving, Adebayo misalbar sa ilang teams

CEBU, Philippines — Sila si Kyrie Irving ug Bam Adebayo milugwa nga mga bayani luyo sa kulbahinam nga kalamposan sa tagsa-tagsa nila ka teams.

Si Irving milansang sa iyang 20-foot floater dayong kapupos sa oras aron agakon ang Dallas Mavericks ngadto sa makapaisa'g balahibo nga kadaogan, 107-105, batok sa defending champion Denver Nuggets. Ang star guard sa Denver nga si Jamal Murray mi-iskor og 12 sa iyang 23 puntos sa katapusang kuwarter, apil niini ang hagpok kaayong tres nga nagtuldok sa nagkayong 20-4 rally nga nakatunol sa Nuggets og 105-102 nga labaw.

Apan ang NBA scoring leader nga si Luka Doncic, nga mibomba og 23 sa iyang 27 puntos sa first half, mitubag pinaagi sa pagposa og 3-pointer sa wala pa si Irving misul-ot sa kapa sa bayani.

Si Irving mitapos uban ang 24 puntos, siyam ka assists ug pito ka rebounds alang sa Mavs, nga ikapito karon sa Western Conference bitbit ang 39-29 rekord.

Ang two-time MVP nga si Nikola Jokic mitali og 16 puntos ug 11 ka rebounds apan nahoyhoy ang abaga gumikay kay ang Nuggets nadakin-as ngadto sa 47-21 human maputol ang lima ka sagunson nilang ratsada.

Sa laing bahin, ang makapakurat nga buzzer-beater 3-pointer ni Adebayo nga dunay gilay-on nga 30 ka tiil mituboy sa Miami Heat ngadto sa 104-101 nga pagpayaka sa Detroit Pistons.

Sa kinatibuk-an, si Adebayo mihipos og 20 puntos nga iyang gipalamanan og 17 ka rebounds.

Si Duncan Robinson, nga mipaulbo og 30 puntos, nadoble ang selebrasyon kay nahimo man siyang labing paspas nga NBA player sa kasaysayan nga nakapasud og 1,000 ka 3-pointers. Iya kining nakab-ot sa ika-343 niyang duwa.

Sa ubang mga resulta, si Sam Hauser mikadlit og career-high 30 puntos sa dihang gibuntog sa Boston Celtics ang Washington Wizards, 130-104, si Victor Wembanyama mikolekta og 33 puntos, 16 ka rebounds, pito ka blocks, ug pito ka assists aron pangulohan ang 

San Antonio Spurs ngadto sa 122-115 nga pagpaluhod sa Brooklyn Nets sud sa overtime, si Paolo Banchero mi-iskor og 29 puntos sa 111-96 nga pagpatikangkang sa Orlando Magic sa Toronto Raptors, samtang si Dejounte Murray miposte og 21 puntos sa dihang gibihag sa Atlanta Hawks ang Los Angeles Clippers, 110-93.