Cablao nanghawod sa Pebrero sa CEPCA monthly
CEBU, Philippines — Si Edwin Cablao maoy unang mihimo og kasikas pagbalik sa binulan nga torneyo sa Cebu Executives and Professionals Chess Association (CEPCA) human iyang gidominar ang Pebrero nga edisyon niadtong Dominggo didto sa Robinsons Galleria Cebu.
Gikumpleto ni Cablao ang lima ka hugna nga kompetisyon uban ang perpektong 5.0 puntos aron langkaton ang titulo nga nagtangag og P1,200 nga ganti.
Human nakapahimus og bye sa unang hugna, si Cablao mipilde nilang Jun Albert Colonia, Reynaldo Flores, National Master Leonardo Alidani, ug Romualdo "Jojo" Muralla aron pagsilyo sa dalaygon niyang 5-0 sweep sa usa ka adlaw nga aksiyon nga gipasiugdahan ni CEPCA President Engr. Jerry Maratas.
Sila si Antonio Cabibil ug Amado Olea, Jr. mitapos sa ilang kampanya bitbit ang managsamang 4.5 puntos apan si Cabibil ang miangkon sa ikaduhang puwesto tungod sa mas taas niyang higher tiebreaker.
Tungod niini, si Cabibil makig-uban ni Cablao ngadto sa grand finals nga giulohan og "Battle of Champions" nga maoy panapos sa tuig nga kalihukan sa CEPCA karong Disiembre.
Si Olea mipahiluna sa ikaduhang dapit, samtang sila si Rosendo Yamyamin ug Flores maoy mi-okupar sa ikaupat ug ikalimang puwesto uban ang 4.0 puntos matag usa.
Sa laing bahin, sila si Cabibil ug Olea maoy best players sa Class A ug sila si Cablao ug Richard Ouano sa Class B.
Ang ubang mga top performers mao sila si Flores (seniors 60-above), Nefriterry Conde (female), ug Duane Gabriel Esmoso (kiddies 12 Under).
- Latest
