Centeno swak sa Last 16
MANILA, Philippines — Tumumbok si reigning WPA World Ten-Ball women’s champion Chezka Centeno ng dalawang sunod na mahalagang panalo papasok sa Last 16 ng Predator Pro Billiard Series Women’s Showdown event sa Rio All-Suite Hotel and Casino sa Las Vegas.
Kahapon ay tinalo ng 24-anyos na si Centeno si Emilyn Callado, 2-0, sa winner round 1 at saka pinayuko si Austrian pool player Jasmin Ouschan, 2-1, sa winners qualification.
Hindi pa alam kung sino ang susunod na makakalaban ni Centeno sa Last 16 at ang sigurado lang ay lumakas ang asam niyang masungkit ang korona sa $60,000 prize fund tournament kung saan ay hahamigin ng magkakampeon ang $18,000, habang $10,500 ang makukuha ng second placer.
Swak din sa Last 16 ang kasalukuyang WPA World 9-Ball women’s champion na si Chou Chieh-Yu ng Chinese Taipei matapos daigin sina Soledad Ayala ng Argentina, 2-0, sa winrer round 1 at Eylul Kibaroglu ng Turkey, 2-0, sa winners qualification.
Samantala, laglag na ang isang Pinay cue artist na si Dori De leon matapos malasap ang dalawang sunod na kabiguan.
Naimbitahan si Centeno na tumumbok sa prestihiyosong Las Vegas Open Women na parte ng CueSports International Expo ay dahil sa pagiging world champion nito nakaraang taon sa Austria.
Mag-uuwi ng tig-$5,200 ang dalawang matatalo sa semifinals, habang tig-$2,625 ang apat na tumalsik sa quarterfinals.
- Latest
