Kai Sotto maraming natutunan kay Cone
MANILA, Philippines — Aminado si Kai Sotto na marami itong natututunan kay Gilas Pilpinas head coach Tim Cone sa buong panahon na kasama nito ang beteranong coach sa training camp.
Malalim ang karanasan ni Cone na pinakamatagum-pay na coach sa PBA at makailang ulit nang naging mentor ng national team sa mga international tournaments.
Dala ni Cone ang sistema nito sa Gilas training camp sa Inspire Sports Academy sa Calamba, Laguna.
Kaya naman nais ni Sotto na ma-absorb ang lahat ng itinuturo ni Cone na magagamit nito sa kanyang basketball career.
“I’ve been learning so much from coach Tim, in fact, even my dad, he used to tell me stories of the time he played under him,” ani Sotto.
Hindi ito ang unang pagkakataon na naging magkasama sina Sotto at Cone sa team.
Bahagi si Cone ng coaching staff noong 2023 FIBA World Cup na ginanap sa Pilipinas kung saan tumayong head coach noon si Chot Reyes.
“I’ve experienced that playing under him during World Cup and I think all of us in such a short period of time, we already learned so many things that we will be applying in the coming games,” ani Sotto.
- Latest
