Asian Supercup Winter League: 5 ka USC Baby Warriors mopakita'g aksiyon sa Korea

CEBU, Philippines — Lima ka mga players sa University of San Carlos (USC) Baby Warriors sa Cebu Schools Athletic Foundation, Inc. (CESAFI) ang nangandam sa usa ka kasinatian nga dili nila mahikalimtan sa dihang dad-on nila ang ilang abilidad sa langyawng lapyahan pinaagi sa Asian Basketball Club Tournament (ABCT) 2024 Supercup Winter League karong Pebrero 15-18 didto sa Hongcheon, South Korea.

Kini mao sila si Kristian Niño Sala, Zach Xavier Natividad, Gabriel Ocaña, Kyrie Franz Dysam, ug Chris Liam Ybañez.

Ang mga garbo sa Baby Warriors kabahin sa Heart of Basketball Academy Sports Club sa Singapore nga mokumbati sa Under 15 category sa upat ka adlaw nga torneyo nga gisalmotan og dili momimus 12 ka nasud apil na ang Pilipinas, host Korea,  China, Singapore, Hong Kong, Japan, Indonesia, Malaysia, Thailand, Vietnam, ug Chinese-Taipei. Moduwa sila ubos sa pagtimon ni coach Franz Dysam, kanhi star guard sa Letran Knights sa mabulokon niyang panahon sa NCAA.

Ang ABCT, nga mao kanhi ang Kobla Cup ug giorganisa sa Korean Federation in the Philippines, usa ka kahugpongan sa paugnat sa kusog kansang misyon mao ang pagbaid sa abilidad sa mga batan-ong basketbolista gikan sa nagkadaiyang mga nasud dinhi sa Asya.