Sinulog Cup 2024: Team EGS magsugod na'g depensa sa ilang korona

CEBU, Philippines — Ang Team EGS ni Cebuano sports patron Wilson Bas Villanueva magsugod na pagpanalipod sa ilang trono sa dihang ang Sinulog Cup 2024 Basketball Tournament mosikad na karong adlawa didto sa Cebu City Sports Institute (CCSI) gym sa Barangay Sawang Calero.

Bisan tuod og sila ang defending champion, si head coach Edsel Vallena mikonsidera sa EGS nga'underdog' ning lima ka adlaw nga torneyo nga gipaluyohan sa Sinulog Foundation, Inc. (SFI). Wala na hinoon siya mohatag pa og rason sa paghulagway niya niini sa iyang puwersa.

"Ako ikasaad aning duwaa ron nga bisan underdog mi, tagaan namo sila og maayong fight," matud pa ni Vallena. "Dili mi basta-basta mo give-up. Molaban gihapon ni among team kutob sa among mahimo. Hangtud dili mo-buzzer ang 4th quarter, tagaan namo sila og maayong duwa."

Sa ilang tinguha nga madepensaan ang ilang korona, ang EGS magsandig nilang ex-PBA players Paul Desiderio ug Jojo Tangkay, kanhi CESAFI MVP Shaq Imperial, MPBL veteran John Orbeta, ug kanhi collegiate standouts nga sila si Kevin Villafranca, JC Escalona, Justine Dacalos, ug James Ferraren. Nagkumpleto sa 15-man lineup sa EGS mao sila si Joseph Cabahug, Cris Dumapig, Kent Ivo Salarda, Van Clark Alsola, Mike Parilla, King Harvie Orcullo, ug Christwil Villanueva.

Ang EGS mosakbang sa United Negros Basketball League (UNBL) sa Bacolod City sa pasiunang duwa sa alas-3 sa hapon, samtang ang Team Khalifa sa Tacloban City makigharong sa CESAFI first runner-up University of Cebu (UC) Webmasters sa ikaduhang duwa sa alas 4:30 sa hapon.

Ang Chase Tower Runs ni shipping tycoon Chase Cokaliong mo-debut sa commercial league batok sa Z'Nars Jewelry sa Marawi City sa alas-6 sa gabii, samtang ang OCCCI Sheermasters sa Ormoc makigpinaksitay sa laing college team nga Cebu Roosevelt Memorial Colleges (CRMC) Mustangs sa main game sa alas 7:30 sa gabii.

Ang walo ka mga entrante magkumbati ubos sa single round robin format diin ang top 2 matag bracket mo-abante sa crossover semifinals. Ang mga mananaog magsangka dayon sa tinagakay nga duwa alang sa titulo. Ang makampiyon mobulsa og P150,000. Ang mopahiluna sa ikaduhang dapit makadawat og P100,000, samtang ang malandig sa ikatulo ug ikaupat nga  puwesto mokubra og P50,000 ug P25,000.