Cebu Grand Prix sulod na sa quarterfinals sa Donling Cup 2024
CEBU, Philippines — Nakakubit na sab og laing daog ang Cebu Grand Prix human gipilde ang New Era, 66-53 sa nagkainit nga aksyon sa Donling Cup 2024 sa miaging gabii diha sa Ateneo de Cebu old campus sa Mango Avenue, Cebu City.
Sa maong kadaogan ang Cebu Grand Prix ni team manager Errol Mendoza segurado na nga masulod sa quarterfinals ning maong liga nga giorganisar sa Brothers Ball League ubos sa pagpangulo ni Marvin Sillar.
Ang Cebu Grand Prix nga dunay 7-1 nga baraha gipangulohan sa best player niining si Lucky Mendoza pinaagi sa iyang 20 puntos uban ang lima ka rebounds ug upat ka assists. Si Nash Parame miamot og 12 puntos, samtang sila si John Cabalhin ug Angelo Ponce mitampo'g 10 puntos matag usa.
Bugtong si Glen Ventolero lang ang miiskor og double figures sa New Era sa iyang 15 puntos. Ang New Era ni Chris Ivan Batitay nahimutang karon sa ikapitong dapit sa standing bitbit ang 2-5 nga baraha.
Sa laing aksyon, ang JMD Automotive walay kukaluoy nga milubong buhi sa CJL Sniper, 74-50 alang sa ilang 5-2 nga baraha.
Gipangulohan kini sa best player nga si Kevin Pepito sa iyang 13 puntos, pito ka rebounds ug lima ka assists, gisundan ni Alain Tarona nga dunay 12 puntos. Si Mark Tanginan mipupo og 12 puntos alang sa JMD ni Gerald Dilao.
Nangu sa CJL Sniper ni James Lapinig nga dunay 3-4 record mao si Michael Tan nga mipabuto'g 12 puntos, samtang si Rondirk Monterola mikadlit og 10 puntos sa napildeng koponan.
- Latest
