Primates, Boleras kampiyon sa Southworks Basketball League

CEBU, Philippines — Ang Primates ug ang Boleras gikoronahang mga kampiyon sa Southworks Basketball League (SBL) didto sa City Sports Club-Cebu gym  ning bag-ohay pa lamang.

Luyo sa impresibong salida ni Samson Miguel Mansalay, ang Primates nakaipsot batok sa Panthers, 91-90, sa kulbahinam nilang final match aron sakmiton ang titulo.

Si Mansalay mipabuto og 25 puntos uban ang tulo ka rebounds, walo ka assists ug lima ka steals hinungdan siya maoy gibayaw nga Finals MVP.

Naapil sab siya sa Mythical Five kauban silang Papart Moncada, Kevin Reyes, Reynante Diongzon, ug Edward Coronado.

Si Diongson mibubo og 33 puntos, siyam ka rebounds, lima ka assists, ug tulo ka assists apan nakawang ang iyang paningkamot alang sa Panthers.  Sa laing bahin, ang Boleras maoy giyukboan nga hara sa women's 3x3.

Si Laine Bresette ang milabi sa MVP award uban ang 10 puntos, upat ka rebounds ug tulo ka assists.