Kamaru batok RJ Store sa finals sa North Shooters Club Season 4

CEBU, Philippines — Gipanglubong sa Kamaru ug RJ Store ang ilang tagsa-tagsang kaatbang aron maoy mag-abot sa finals sa North Shooters Club Season 4 Christmas League 2023.

Ang Kamaru mitagak sa Hardway, 93-78 ug ang RJ Store mipalagpot sa Unicast, 101-69 sa semis niadtong Lunes sa gabii diha sa J&J gym sa Lilo-an, Cebu. Ang knockout finals gitakda karong gabii.

Nagmangtas dayon si Toper Pilapil pagsugod aron mohipos sa kinatibuk-an niyang 25 puntos ug ingon man mangulo sa opensa sa Kamaru ni Merlou Mercader.

Si Jayr Rosatase, kinsa nanginit sab sa first quarter miiskor og 16 puntos alang sa gidebuwenas nga Kamaru, kansang mga itsa nanulod nga nakainat sa labaw ngadto sa 79-56 paingon sa final period. Sila si Michael Rojo ug Renz Cano parehong mitampo'g 11 puntos sa maong kadaogan.

Ang Hardway ni Jhon Lie Caumeran nga wala gyud makatilaw og labaw gikan sa pagsugod, gipangulohan ni Jimuel Molo pinaagi sa iyang 14 puntos.

Sa laing bahin, si Francis Rey Dabasol nga wala kapugngi sa ilawom mao sab ang topscorer sa RJ Store nga adunay 13 puntos, gisundan ni Jowil Sugarol sa iyang 12 puntos.

Namuntos sab og maayo sa RJ Store si Alger Comendador nga mipaksit og 11 puntos ug Jhonel Degamo nga milaksi'g 10 puntos. Ang team manager nga si Mark Louie Pepito mitunol og nuybe puntos sa iyang koponan nga sa third quarter pa lang nakapanimaho na sa ilang sayong kadaogan human miposte og 84-55 paghuman sa maong kuwarter.

Bugtong si Japeth Naingue lang ang milansang og double figures sa iyang 13 puntos aron pangulohan ang Unicast ni Lucas Suarez nga moduwa na lang alang sa ikatulong dapit batok sa Hardway.

Ang liga gidumala ni ballclub president Merlou Mercader ug vice president Arnold Astillero sa abag nilang Choy Pilapil, Joe Velez, Jantoy Entrampas ug Jenrex P. isip mga reperi.