Lucky 9 sa UV Lancers

CEBU, Philippines — Ang defending champion University of the Visayas (UV) Green Lancers nagsandig sa mainit nga ratsada sa ikatulong kuwarter aron patikangkangon ang University of San Carlos (USC) Warriors, 75-67, ug inaton ang perpekto nilang rekord ngadto sa 9-0 sa Cebu Schools Athletic Foundation, Inc. (CESAFI) Season 23 Men's Basketball Tournament niadtong Huybes sa gabii didto sa Cebu Coliseum.

Si Kent Ivo Salarda mihipos og 21 puntos, si Ivan Carl Alsola midugang og 14 puntos samtang si Froilan Maglasang miamot og 10 puntos alang sa Lancers nga mipaduol ngadto sa usa na lang ka daog aron kumpletohon ang 10-game sweep sa eliminasyon.

Makab-ot sa Lancers ang talagsaong dungog kon ilang pakagingon ang University of Southern Philippines Foundation (USPF) Panthers karong Domingo, Nobiyembre 26. Sa juniors level, ang University of Cebu (UC) Baby Webmasters nakaipsot batok sa Cebu Eastern College (CEC) Dragons, 85-84, aron tayhupan og kinabuhi ang ilang tsansa sa makasud sa semifinals.

Ang Baby Webmasters anaa karon sa ikaupat nga puwesto uban ang 7-3 win-loss rekord.

Apan kinahanglan pa silang mag-ampo nga ang 6-3 nga University of the Visayas (UV) Baby Lancers mapilde sa 4-5 nga City of Bogo Science and Arts Academy (CBSAA) Trailblazers karong adlawa.

Kon kini mahitabo, ang Baby Webmasters maoy mo-angkon sa ikaupat ug katapusang luna sa semis.

Apan kon ang UV modaog, ang Baby Lancers maoy mo-abante sa Final Four pinaagi sa winner-over-the-other rule kay ilang mang gi buntog ang Baby Webmasters.