Bucks hiniya ng Celtics sa balwarte

BOSTON, Philippines — Kumolek­ta si Jayson Tatum ng 23 points at 11 rebounds para buhatin ang Celtics sa 119-116 pag-eskapo laban sa Milwaukee Bucks sa showdown ng dalawang top Eastern Conference teams.

Nagsunog si Jaylen Brown ng 26 points at nag­lista sina Kristaps Porzingis at Derrick White ng 21 at 13 markers, ayon sa pagkakasunod, para sa Boston na pinaganda ang kanilang NBA best record sa 12-3.

Pinamunuan ni Brook Lopez ang Milwaukee (10-5) sa kanyang 28 points habang may 27 markers si Damian Lillard at nalimitahan si Giannis Anteto­kounmpo sa 21 points.

Ipinoste ng Celtics ang 21-point lead sa first half bago nakadikit ang Bucks sa 111-114 sa huling da­lawang minuto ng laro.

Kumonekta si Tatum ng tatlong free throws sa nalalabing 21.2 segundo para selyuhan ang panalo ng Boston.

Sa Orlando, umiskor si Franz Wagner ng 27 points at may 23 markers si Paolo Banchero sa 124-119 pagdaig ng Magic (10-5) sa nagdedepensang Denver Nuggets (10-5).

Sa Los Angeles, tumipa si Kyrie Irving ng 28 points at isinalpak ang isang go-ahead three-pointer sa hu­ling 22 segundo sa 104-101 paglusot ng Dallas Mavericks (10-5) sa Lakers (9-7).

Sa Houston, humataw si Fil-Am Jalen Green ng season-high 34 points sa 111-91 panalo ng Rockets (7-6) sa Memphis Grizzlies (3-11).

Sa Cleveland, nagsalpak si Kyle Lowry ng pitong tres para sa kanyang season-high 28 points sa 129-96 pagsunog ng Mia­mi Heat (10-5) sa Cavaliers (8-7).