Centeno gikoronahang world champion sa women's 10-ball
CEBU, Philippines — Ang pambato sa Pilipinas nga si Chezka Centeno mihatag og dakong kadungganan sa iyang mga kababayan human siya gikorohang rayna sa women's 10-ball sa tibuok kalibutan.
Kini human gibuntog ni Centeno si Yu Han sa China, 9-5, sa final sa World 10-Ball Women s Championship niadtong Dominggo sa gabii didto sa Klagenfurt, Austria.
Ang garbo sa Zamboanga City wala na molingi pa sukad mibulhot sa sayong 4-1 nga labaw dayon na ngadto sa pag-angkon sa $50,000 nga ganti ko P2.8 million nga maoy labing dako sa kasaysayan sa women's billiards.
It was my dream to be world champion, buhagay pa ni Centeno nga nakahilak sa tumang kalipay human makab-ot ang iyang damgo.
Sa iyang dalan padung sa kampiyonato, gipangmakmak ni Centeno ang pipila ka bangiitan niyang mga kaatbang sama nilang Allison Fisher sa England ug Chou Chieh-Yu sa Chinese Taipei nga maoy kampiyon sa miaging tuig.
Ang kadaogan ni Centeno naghatud sab og tam-is nga panimalos batok ni Yu, nga maoy nagtagak sa Sugbuanon niyang kababayan nga si Rubilen Amit sa torneyo.
Matud pa sa 24 anyos nga si Centeno nga nangambisyon siyang ma-world champion niadtong nag-edad pa lamang siya og singko anyos.
19 ka tuig ang milabay, sangko sa langit ang gibating kalipay ni Centeno nga natuman na gyud niya ang iyang pangandoy.
This journey started when I was a five-year-old with a dream, and today I m living it, suwat pa ni Centeno sa iyang Facebook. It s a surreal moment that brings back memories of countless hours of hard work, tears, and disappointments. They re all worth it.
- Latest
