Homesourced 8-0 na sa Inter-BPO League
CEBU, Philippines — Ang Homesourced mipatikalbong sa Aces, 77-62, aron pagpabiling way pilde sa labing unang Hoop Nation Inter-BPO Basketball League nga gipaluyohan sa Hype Pro Cebu didto sa City Sports Club-Cebu gym.
Si James Villafuerte mipupo og 16 puntos, walo ka rebounds ug tulo ka assists alang sa Homesourced, nga mipahugot sa ilang pagkupot sa solong liderato sa West Coast bitbit ang perpektong 8-0 nga marka.
Sa East Coast, ang Conduent mibugha sa TDCX, 65-50, aron pagmintinar sa ikaduhang puwesto uban ang 8-2 win-loss record. Si Khent Rudinas maoy nangu sa Conduent uban ang 19 puntos, siyam ka rebounds, ug usa ka assist.
Sa ubang mga resulta, ang Iploy milampornas sa Optum, 63-48, ang SVC Bulldogs midemolis sa Fuse United, 93-57, samtang ang Bankers miitsapwera sa Kuehne+Nagel, 65-49.
Si Syoty Menchavez mihipos og 14 puntos, lima ka rebounds ug pito ka assists alang sa Iploy nga ikaupat karon sa East uban ang 7-3 nga baraha.
Si Nino Marayan mitali og 12 puntos, upat ka rebounds, ug duha ka assists alang sa SVC Bulldogs nga miinat sa ilang rekord ngadto sa 5-4 samtang si Kevin Reyes miposte og double-double nga 16 puntos ug 10 ka rebounds aron tabangan ang Bankers paglansang sa ikaupat nilang daog sud sa siyam ka duwa.
- Latest
