Balamban Fiesta Cup AC Troopers, Tuburan 360 Coffee gisubhan og daog

CEBU, Philippines — Giablihan sa AC Troopers/Eversure ug Tuburan 360 Coffee ang tagsa-tagsa nila ka mga kampanya pinaagi sa usa ka masipang buto sa Balamban Fiesta Cup 2023 Inter-Commercial Invitational Basketball Tournament niadtong Sabado sa gabii didto sa Esperanza Binghay Memorial Sports Complex sa Balamban, Cebu.

Si Emman Calo mipabuto og 39 puntos uban ang upat ka assists aton pangulohan ang AC Troopers ngadto sa 102-85 nga demolisyon sa K & L Marketing sa Naga City.

Miamot si Tansiong Bonganciso og 16 puntos ug siyam ka rebounds samtang si Patrick Cabahug mitimbre og 12 puntos, siyam ka rebounds ug lima ka assists alang sa AC Troopers nga kontrolado kaayo ang duwa sukad sila miposte og sayong 28-16 nga labaw.

Si Fletcher Galvez mihipos og double-double nga 23 puntos ug 16 ka rebounds samtang si Joseph Nalos mitali og 16 puntos, upat ka rebounds ug pito ka assists apan nakawang ang ilang paningkamot alang sa K & L.

Sa laing duwa, sila si Loufred Diamante ug Mike Parilla mikadlit og 19 puntos matag usa sa dihang gipakaging ss Tuburan 360 Coffee ang EGS-Talisay City, 90-86.

Si Jiesel Tarossa mihipos og 14 puntos, walo ka rebounds ug duha ka assists samtang si Alfred Belande mitampo og 10 puntos ug upat ka rebounds alang sa Coffee Makers, nga nanginit sa naghinapos nga bahin sa duwa aron paksiton ang EGS.

Ang EGS abante unta og singko puntos human sa tulo ka kuwarter, 74-69, apan dali nga na-ilog sa Tuburan ang labaw, 81-78, sa pinal nga singko minutos sa aksiyon ug wala na sila molingi pa sukad niadto. Si Justine Dacalos maoy nangu sa EGS uban ang 16 puntos, tulo ka rebounds ug tulo ka assists. Si Jestoni Baclaan mi-iskor og 13 samtang si Monic Soliva ug Richmond Bersabal nagkumboya og 21 puntos sa pilderong kawsa.