Agi'g pagyukbo sa NBA legend  Lakers motukod og monumento ni Bryant

CEBU, Philippines —  Ang Los Angeles Lakers moyukbo ni anhing Kobe Bryant pinaagi sa pagtukod og monumento sa Hall of Fame guard atubangan sa ilang arena.

Ang bronseng estatwa ni Bryant pormal nga subhan ug ablihan sa publiko karong Pebrero 8, 2024 didto sa Star Plaza gawas sa Crypto.com Arena sa dili pa ang duwa sa Lakers batok sa defending NBA champion Denver Nuggets.

Si Vanessa Bryant, ang asawa ni Kobe, maoy mipahibawo niining kalamboan pinaagi sa usa ka bidyo nga iyang gi-post sa social media atol sa gibansagan sa Lakers nga "Kobe Day", ang ikawalong bulan ug ika-24 nga adlaw nga nagsimbolo sa mga jersey numbers ni Bryant nga 8 ug 24.

"Kobe played his entire 20-year NBA career as a Los Angeles Laker," matud pa ni Vanessa Bryant. "Since arriving in this city and joining the Lakers organization, he felt at home here, playing in the City of Angels."

"On behalf of the Lakers, my daughters and me, I am so honored that, right in the center of Los Angeles, in front of the place known as the house that Kobe built, we're going to unveil his statue so his legacy can be celebrated forever."

Ang 18-time NBA All-Star nga si Bryant miretiro niadtong 2016 isip labing unang player sa kasaysayan sa NBA nga nakaduwa og dili mominus 20 ka seasons sa usa ka prangkisa.

Namatay siya sa helicopter crash niadtong Enero 6, 2020 sa edad nga 41 kauban ang iyang anak nga si Gianaa ug laing pito pa ka tawo.

Apil sa mga legasiya ni Bryant mao ang paggiya sa Lakers ngadto sa lima ka kampiyonato sa NBA diin siya gibayaw nga season MVP niadtong 2008 ug Finals MVP niadtong 2009 ug 2010. Naapil siya sa All-NBA First Team sud sa 11 ka higayon ug sa All-Defensive First Team siyam ka higayon.

Si Bryant, nga kaduha midaog og gold medal sa Olympics, maoy all-time scoring leader sa Lakers sa regular season uban ang 33,643 puntos.

"Kobe Bryant was one of the most extraordinary athletes of all time and one of the most iconic individuals in the history of Los Angeles," dason pa ni Lakers team owner Jeanie Buss sa usa ka opisyal nga pamahayag. "There's no better place for Kobe to be honored with a statue than here, at the center of our city, where everyone can celebrate him and be inspired by his incredible achievements."