Gilas women nitapos sa kampanya sa ikaunom nga pwesto

Natapos sa Gilas Pilipinas women ang ikaunom nga pwesto sa nagpadayong FIBA Women’s Asia Cup Division A, human sila napildi sa South Korea 80-71 didto sa Quaycentre sa Sydney, Australia. Hinuon bisan pa niini, angayan gihapon silang daygon ug pakpakan tungod kay sila lang ang makonsiderar nga gagmay og lineup nga koponan nga nakasulod sa Division A.

Nakaatubang sa Gilas ang South Korea human sa sikit kaayo nilang duwa batok sa mga higanteng Kiwis sa New Zealand nga nakapatagak kanila aron unta makasulod sa Final Four round. Ang South Korean nga nabutang sa World No. 12 milubong unta og 19 puntos sa Gilas apan tungod sa paningkamot sa mga Pinay nakaapas sila una pa napupos ang oras.  Ang Gilas Pilipinas women naa sa world No. 42 FIBA ranking. Ang 1984 Asian Championships diin ikaupat ang Pilipinas maoy kinatas-ang naabot sa koponan sa kasaysayan niini pagsalmot sa maong prestihiyosong torneyo.

Nagpasabot kini nga bisan ikaunom lang kini karon, makonsiderar gihapon kining dakong kalamposan sa programa tungod kay sukad 1984 wala makaabot sa ilang naabot karon ang mga gipadalang teams gikan 1985 hangtud 2022.— /IBM