Grizzlies milampaso sa Warriors
CEBU, Philippines — Ang Memphis Grizzlies milusad og eksplosibong opensiba sa unang kuwarter dayon na ngadto sa pagposte og 131-110 nga demolisyon sa karibal nilang Golden State Warriors sa NBA kagahapon didto sa FedEx Forum sa Memhis, Tennessee.
Bangis kaayo ang Grizzlies nga mipabuto og 48 puntos sa unang kuwarter nga nahimo nilang hinagiban aron tumbahon ang Warriors.
Si Tyus Jones maoy nangu sa Grizzlies uban ang 22 puntos samtang sila si Desmond Bane ug Jaren Jackson Jr. midugang og 21 puntos matag usa.
Ang pagbihag nila sa Warriors usa ka maayong balita alang sa Grizzlies, nga miduwa nga wala gihapon ang alas nilang si Ja Morant.
Si Morant suspendido pa gihapon hangtud karon ug padayong gi-imbestigahan sa mga kapolisan gumikan sa pag-post niini og video sa social media diin siya nagkupot og pusil sa usa ka strip club.
Sa iyang bahin, gibasol ni Warriors coach Steve Kerr ang dili maayo niyang taktika diin gidungan niya pagpasud ang upat nila ka guards hinungdan nga gilat-an sila sa Grizzlies.
"We've gotten off to bad starts in the last six or seven games so we were looking for a little daylight early in the game," matud pa ni Kerr. "We wanted to get some good shots early, but we didn't do that. We were impatient and took some really tough, quick shots."
"I think in hindsight we got a little too cute with that. But we are where we are. We took a gamble and it didn't pay off," dugang pa ni Kerr.
Sa laing aksiyon, ang Milwaukee Bucks nakalingkawas batok sa Brooklyn Nets, 118-113, bisan og wala ang superstar nilang si Giannis Antetokounmpo.
Si Bobby Portis mipatuasik og 28 puntos samtang sila si Brook Lopez ug Grayson Allen nagkumboya'g 43 puntos alang sa Bucks, nga mibulhot ngadto sa 22 puntos nga labaw sa ikaduhang kuwarter.
Igo lamang nakasikit ang Nets ngadto sa dos puntos sa hilimatyong segundos sa duwa.
Ang Bucks padayong naghari sa Eastern Conference bitbit ang 48-18 record.
- Latest
