Doncic, Irving mi-agak sa Mavs batok Sixers

CEBU, Philippines — Si Luka Doncic mi-iskor og 42 samtang si Kyrie Irving midugang og 40 puntos sa dihang giwani sa Dallas Mavericks ang Philadelphia 76ers, 133-126, sa NBA kagahapong adlawa didto sa American Airlines Arena sa Dallas, Texas.

Gawas sa eksplosibo nilang opensa nga naghimo kanilang labing unang Mavs teammates nga mipuntos og 40 sa usa ka duwa, misamot pa kanindot ang timplada nilang Doncic ug Irving gumikan nagkumbinar sab sila og 18 ka assists alang sa Mavs.

Nakasikit unta ngadto na lang sa kuwatro puntos ang Sixers human malubong og 25 puntos apan si Irving mibubo og 11 puntos sa nagkayong 15-0 rally pagsugod sa katapusang kuwarter nga nakapalagsik og balik sa Mavs. Wala na sila molingi pa sukad niadto.

Si Joel Embiid mitali og 35 puntos samtang si James Harden dunay 27 puntos ug 10 ka assists apan parehong nangahoyhoy ang ilang abaga sa pilderong Sixers.

Didto sa Washington, si Kyle Kuzma mipatuasik og 30 puntos sa dihang gipaksit sa Wizards ang Toronto Raptors, 119-108.

Si Kristaps Porzingis mihimo sab og kasikas uban ang 25 puntos alang sa Wizards nga mipahayag sa ilang tsansa nga makasud sa playoffs sa Eastern Conference.