Garing midget, SK teams mitikang sa Alegado Cup finals

CEBU, Philippines — Ang Barangay Garing mipadala og duha ka teams ngadto sa finals sa 11th Mayor  Teresa "Nene" P. Alegado Fiesta Cup basketball tournament didto sa Consolacion, Cebu.

Si Edems Pongasi mipaulbo og 36 puntos samtang sila si Vonxyle Tundag ug Bernabe Tubin nagkumboya'g 38 puntos sa dihang ang Garing nakalingkawas sa Polog sud sa duha ka overtime, 116-107, aron pag-abante sa kampiyonato sa SK category B.

Sa midget category B, ang Garing nanoktok na sab sa titulo human gilampaso ang Polog, 70-44. Si Charles Olivio maoy nangu sa Garing uban ang 17 puntos samtang sila si Vince Ashly Mangilaya ug Cristian Nudalo midugang og 16 puntos matag usa.

Sa ubang mga resulta, sila si Bhenz Daug, Danniel Mendoza ug James Osabel nagkumbinar og 38 puntos sa gihang gitagak sa Pulpogan ang Nangka, 80-69, sa midget category A.

Si Gerald Fernandez mipupo og 25 puntos, samtang sila si Franco Te ug Arnel Momo mi-iskor og 17 matag usa sa dihang gipalagpot sa Tayud ang Danglag, 86-74, sa Inter-Barangay category A.

Ang Pitogo ug Jugan mipabakwit sab sa ilang mga karibal.

Si Froilan Maglasang ug John Lloyd Pepito parehong mikadlit og 19 puntos sa dihang gipasibat sa Pitogo ang Tugbungan, 78-71, sa SK category A, samtang sila si Zyril Pilapil ug Lee Dahil nagkumbinar og 27 puntos sa gihang gipalayas sa Jugan ang Tugbungan, 67-58, sa midget category A.

Sa Inter-Barangay category B, ang Panonoy ug Polog mipasaop sab sa tagsa-tagsa nila ka mga kaatbang.

Si Mark Magale miposte og 21 puntos, sila si Neil Herbieto ug Diansen Diano nakatigum og 35 puntos sa dihang gitagak sa Panoynoy ang Lanipga, 77-70. Si Randy de la Pisa mikolekta og 23 putnos samtang si Anthony Pepito miamot og 11 puntos sa dihang gipabakasyon sa Polog ang Tilhaong, 79-75.