Lillard nagpahigot sa Trail Blazers

CEBU, Philippines — Si Damian Lillard mi-uyon mga magpabilin sa Portland Trail Blazers pinaagi sa duha ka tuig nga contract extension nga mibalor og $122 million.

Sigun sa taho sa ESPN ug The Athletic, ang 31-anyos nga All-Star guard mokita og $137 million sa sunod nga tulo ka seasons sa dili pa mo-epekto ang duha tuig niyang contract extension sa 2025-26 ug 2026-27 NBA seasons.

Si Lillard, nga miduwa sa tibuok niyang 10 ka tuig sa NBA uban sa Trail Blazers, mi-average og 24.0 puntos, 7.3 assists, 4.1 rebounds ug 1.0 steals sa miaging season apan nakapakita siya'g aksiyon sud lamang sa 29 ka duwa tungod kay gi-operahan sa na-angol niining tiyan niadtong Enero.

Ang Trail Blazers miposte lamang og 27-55 win-loss record hinungdan nga wala sila makasud sa playoffs sa labing unang higayon sukad niadtong 2013 diin si Lillard maoy gibayaw nga Rookie of the Year.

Ang labing taas nga naabot sa Trail Blazers ubos sa pagpangu ni Lillard nahitabo sa dihang nakatikang sila sa Western Conference Finals ugaling lang kay gi-sweep sila sa Golden State Warriors.

Si Lillard, nga unom ka higayon nahimong NBA All-Star, sakop sa Team USA nga milangkat og gold medal sa 2020 Tokyo Olympics didto sa Japan sa miaging tuig.