Wizards gipakuratan ang Sixers

CEBU, Philippines — Si Spencer Dinwiddie mirehistro og triple-double uban ang 14 puntos, 12 ka rebounds ug 10 ka assists sa dihang gipakuratan sa Washington Wizards ang inilog nga Philadelphia 76ers, 106-103, sa NBA kagahapon didto sa Wells Fargo Center sa Philadelphia, Pennsylvania.

Ang layup ni Dinwiddie sa nahibilin nga 1:30 sa duwa wala lamang makabuak sa 98-98 nga panagtabla, nahimo sab kining yawi sa Wizards ngadto sa kadaogan.

Gawas ni Dinwiddie, mihimo sab og kasikas si Kyle Kuzma nga mipabuhagay og 24 puntos alang sa Wizards nga mipakgang sa unom ka sagunson nilang pilde.

Ang alas sa Sixers nga si Joel Embiid mipupo og 27 puntos ug 14 ka rebounds. Namawi siya gikan sa bugnaw kaayong sinugdanan apan wala mosaler ang iyang pagpanginit sa second half kay nahagba gihapon sila.

Si Tyrese Maxey mihipos og 22 puntos, walo ka rebounds ug pito ka assists samtang si Tobias Harris dunay 18 puntos alang sa Sixers, kansang lima ka sunod-sunod nga daoy naputol.

Didto sa Indianapolis, si Gary Harris mi-iskor og 22 puntos samtang si Wendell Carter Jr. midugang og 19 puntos ug 18 ka rebounds aron tabangan ang Orlando Magic nga makaipsot batok sa Pacers, 119-118.

Didto sa Boston, si Josh Richardson miposa og unom ka tres sa iyang 23 puntos alang sa Celtics, nga nakasugod sa career-high 38 puntos ni LaMelo Ball aron paludhon ang Charlotte Hornets, 113-107.