Paat bigo sa kanyang debut game sa Thailand

MANILA, Philippines — Maasim ang debut ni opposite hitter Mylene Paat matapos lumasap ng 24-26, 25-23, 23-25, 15-25 kabiguan ang team nitong Nakhon Ratchasima laban sa reigning champion Diamond Food sa pagsisimula ng 2021-22 EST Cola Volleyball Thailand League sa MCC Hall The Mall Bang Kapi sa Bangkok, Thailand.

Ilang krusyal na puntos ang nagawa ni Paat sa buong laro kung saan kaliwa’t kanan ang atake nito mula sa open position hanggang opposite side kasama pa ang ilang back row attack. Subalit hindi sapat ang lakas na inilatag ng Nakhon Ratchasima upang makuha ang pambuenamanong panalo sa liga.

Bagsak sa 0-1 ang Nakhon Ratchasima habang umangat sa 1-0 ang Diamond Food.

Susubukan ng Nakhon Ratchasima na makabalik sa porma sa pagharap nito sa Khonkaenstar.

Ito ang unang laro ni Paat sapul nang sumabak ito sa Champions League kasama ang Chery Tiggo sa Lipa, Batangas kung saan nagtapos sila bilang runner-up ang Crossovers.

Matapos ang Champions League, agad na tumulak si Paat sa Bangkok para makasama ang Nakhon Ratchasima sa training camp.