'The Hitman' Jun Manzo misidlak na sab sa Filbasket
CEBU, Philippines — Ang nabantog nga "The Hitman" nga si Jun Manzo mihimo na sab og kasikas tungod sa impresibo niyang salida sa dihang gilampornas sa San Juan Knights-Go For Gold ang Muntinlupa Defenders, 92-66, sa labing unang Filbasket League nga giduwa sud sa bubble didto sa Subic Bay Metropolitan Authority (SBMA) sa Zambales.
Si Manzo miburak og 16 puntos uban ang upat ka rebounds, upat ka assists, ug duha ka steals alang sa Knights ni team owner Jinggoy Estrada, nga wala na molingi pa sukad mibulhot ngadto sa sayong 24-10 nga labaw dayon na ngadto sa pagsolo niini sa ikatulong dapit sa liderato uban ang 4-2 nga baraha.
Ang maong kadaogan nakapadasig sab og balik sa San Juan human sila makatilaw og mapait nga kaparotan, 115-120, sud sa duha ka overtime sa mga kamot sa karibal nilang Davao Occidental Tigers-Cocolife.
"We're taking things one game at a time lang kay crucial naman gyud ang last three games namo," butyag pa ni Manzo, nga unang misikat samtang nagduwa uban sa University of the Visayas (UV) Green Lancers sa CESAFI sa wala pa mikuha og duhang atensiyon uban sa University of the Philippines (UP) Fighting Maroons sa UAAP.
"Ang target namo mag-champion talaga kasi grabe din ang supporta sa amin ni Sen. Jinggoy (Estrada). Ayaw namin siya mapahiya," dugang pa sa garbo sa Nasipit, Agusan del Norte.
Niadtong Marso, ang 22-anyos nga si Manzo gipili sa Blackwater Bossing sa ikaupat nga hugna atol sa 2021 PBA virtual Draft apan wala siya mahatagi og kontrata sa team.
Mao nang ang eksplosibong 5'9" nga point guard mapasalamaton sa oportunidad nga nakapakita siya og usab sa iyang kahanas ug talento sa Filbasket nga iyang gipanghinautan nga makapalusad og balik sa iyang kampanya nga makaduwa sa PBA ugma damlag.
"Grabe ang potential ng Filbasket, maayos at maganda yung liga,"dason pa ni Manzo. "Nagpapasalamat ako kay boss Jai Reyes at yung mga tumulung sa pagbuo ng liga dahil binigyan nila nang trabaho yung mga players."—EBV
- Latest
