James, Westbrook nag-workout sa unang higayon

CEBU, Philippines — Ang duha ka NBA superstars nga sila si LeBron James ug Russell Westbrook nag-workout sa labing unang higayon isip teammates sa Los Angeles Lakers.

Mao kini ang malipayong gipaambit ni James sa iyang Instagram nga iyang gilakipan og hulagway nila ni Wesbrook diin makita nga silang duha nagpasingot sud sa usa ka gym niadtong Domingo.

“Work with the Brodie!” suwat pa ni James,

Nakuha sa Lakers si Westbrook gikan sa Washington Wizards pinaagi sa usa ka trade niadtong Agosto 7 hulip nilang Kentavious Caldwell-Pope, Montrezl Harrell, ug Kyle Kuzma.

Si Westbrook, nga mi-average og 22.2 puntos, 11.5 rebounds ug 11.7 assists sa miaging season, seguradong moporma og usa ka ‘super team’ sa Lakers kauban sila si four-time MVP James, Anthony Davis, ug beteranong si Carmelo Anthony.

Sa susamang IG post ni James, iyang gilabtikan ang iyang mga kritiko ilabi na kadtong dili motoo nga mo-click ang ilang panag-alyansa ni Westbrook.