Spence mibahad paretirohon si Pacquiao
CEBU, Philippines — Taas kaayo ang gitinguha sa way pildeng WBC/IBF welterweight champion nga si Errol Spence Jr. (27-0, 21KOs) sa umaabot nilang engkuwentro ni Sen. Manny Pacquiao (62-7-2, 39KOs) nga gikatakda sa Agosto 21 didto sa T-Mobile Arena sa Las Vegas, Nevada. Kini human si Spence nanganti nga ang sangka niya uban ni Pacquiao mao nay katapusang higayon nga ang bugtong eight-time division world champion sa kasaysayan mokatkat sa ring sa iyang karera.
"I think he'll definitely retire after this fight," matud pa ni Spence ngadtong Brian Custer sa Showtime. Nagdumili hinoon si Spence paghatag og prediksyon kon iya bang ma-knockout ang Pinoy ring legend.
"I don't know, we'll see. You have to tune in," dason pa ni Spence, nga manghud og 11 ka tuig sa 42 anyos nga si Pacquiao.
Bisan pa man sa iyang bahad nga paretirohon si Pacquiao, si Spence nasayud kon unsa kamahinungdanon ang maong away kay mao kini ang magpamatuod nga usa siya sa labing bangiitan nga boksidor sa tibuok kalibutan.
"A win over Pacquiao will show everybody why I am one of the best fighters in the world," batbat pa ni Spence.
- Latest
