Kalei Mau makakalaro na sa national team
MANILA, Philippines — Sa wakas masisilayan na sa aksyon si Filipino-American Kalei Mau suot ang Team Philippines jersey sa mga international tournaments partikular na sa 2021 Southeast Asian Games sa Hanoi, Vietnam sa Nobyembre.
Inaprubahan na ng International Volleyball Federation (FIVB) ang pagpapalit ng volleyball federation ng 6-foot-2 outside hitter.
Mula sa pagiging mi-yembro ng USA Volleyball federation, magiging opis-yal nang miyembro ng Philippine volleyball federation si Mau.
Ipinaalam na ng FIVB ang desisyon nito sa Phi-lippine National Volleyball Federation (PNVF), United States of America Volleyball, at sa North, Central America and Caribbean Volleyball Confederation.
Matatandaang hindi nakapaglaro si Mau noong 2019 SEA Games na ginanap sa Maynila dahil sa problema sa affiliation nito.
Wala pang clearance noon si Mau para makapaglaro para sa Pilipinas dahil miyembro pa ito ng USA Volleyball na nakalista sa FIVB records.
Ngayong may go signal na si Mau mula mismo sa FIVB, wala nang makapipigil pa para makapaglaro ito sa SEA Games gayundin sa Asian Games at iba pang international tournaments.
Pinaghahandaan ng Pilipinas ang pagsabak nito sa 21st Asian Seniors Women’s Volleyball Championship na gaganapin sa Pampanga gayundin ang Vietnam SEA Games.
Naglalaro naman si Mau sa Liga De Voleibol Superior Femenino ng Puerto Rico kung saan bahagi ito ng Changas de Naranjito.
Sa oras na matapos ang liga sa Puerto Rico, agad itong tutulak sa Pilipinas para makasama ang national team.
- Latest
