Komentador sa ESPN kuyawan ni Pacquiao ma-KO batok ni Crawford
CEBU, Philippines — Gibati og kahadlok ang usa ka ESPN sports commentator basin makatilaw og "knockout" nga kapildihan si Manny Pacquiao kon iya gyud nga dayonon og harong si reigning WBO world welterweight champion Terence Crawford.
Sa usa ka episode sa ESPN "First Take," si Stephen A. Smith nihunghong ngadto sa laing commentator Max Kellerman nga gitan-aw niya si Crawford nga usa sa mga ngilngig nga boksidor sa kalibotan ug dili kini madali-dali ni Pacquiao, ang kasamtangang eight-division world champion sa kasaysayan.
“When you look at Pacquiao, he’s great, he’s aged, we get that. I’m saying this because of Crawford, not because of Pacquiao. I’m just saying Crawford is, he’s on another level,” matud pa ni Smith. “I love Pacquiao and I’m scared he’s gonna get knocked out.” Sumala pa The Athletic, ang kampo ni Pacquiao ug Crawford naghisgut na alang sa posibleng away nga lagmit mahitabo karong Hulyo 5 didto sa Abu Dhabi.
Ang 42-anyos nga si Pacquiao (62-7-2, 39KOs) wala na makaaway sukad niya naangkon ang World Boxing Association (WBA) 'Super' welterweight title human nidaog pinaagi sa 'split decision' batok sa Amerikanong si Keith Thurman niadtong Hulyo 2019. Apan gilangkatan sa iyang "Super" welterweight title gumikan kay napakyas siya pagdepensa sa iyang titulo.
Sa iyang bahin, ang 33-anyos nga si Crawford (37-0, 28KOs), katapusang niaway niadtong Nobiyembre diin iyang gipatikangkang si Kell Brook.
- Latest
