LeBron nagpahigot sa LA Lakers

CEBU, Philippines — Gidawat ni NBA superstar LeBron James ang duha ka tuig nga contract extension nga mibalor og $85 million uban sa Los Angeles Lakers.

Segun sa taho sa ESPN, ang ahente ni James nga si Rich Paul mibutyag nga ang four-time NBA champion mokita og $39.2 million sunod season, $41.1 million sa 2021-2022, ug $44.5 million sa 2022-2023. Sa panahon nga mapupos na ang iyang kontra, si James duha ka dekada na ang pagtinir sa liga.

Sa miaging season nga gihamok sa pandemiya, si James nga mag-36 anyos ning bulana mi-average og 25.3 points ug maoy nangu sa NBA sa assists uban ang 10.2 assists matag duwa. Gibayaw siya nga Finals MVP human gipilde sa Lakers ang Miami Heat sud sa unom ka duwa sa NBA Finals.

Nahimo siyang labing unang player sa kasaysayan sa NBA nga nakaangkon sa maong pasidungog sa tulo ka managlahing teams. Una kini niyang nakab-ot sa Heat niadtong 2012 ug 2013 ug dayon sa Cleveland Cavaliers niadtong 2016.

Sa pagsud niya sa ika-18 niyang season, si James ikatulo sa NBA all-time scoring list uban ang 34,241 points, sunod nilang Karl Malone (36,928) ug Kareem Abdul-Jabbar (38,387).