5th Stay at Home chessfest paragua mobanat sa "Grandmaster Class"

CEBU, Philippines — Nagkanindot ug nagkadako ang Stay at Home Chess Challenge" dili lamang sa premyo, apan hasta sab sa kalibre sa mga partisipante niini.

Kini gumikan kay tulo ka mga world-class players nga gipangulohan ni Pinoy Grandmaster Mark Paragua ang mosalmot sa ikalimang edisyon sa binulan nga torneyo nga giulohan og "Grandmaster Class" nga duwaon pinaagi sa lichess.org sa alas-5 sa hapon karong Agosto 1.

Si event organizer International Master Kim Steven Yap sa Cebu School of Chess nagkanayon nga gawas ni Paragua, moduwa sab ang duha ka Woman GMs nga sila si Gong Qianyun sa China ug Nafisa Muminova sa Uzbekistan.

Si Paragua nga tua na magbasi sa New York, maoy nanghawod sa labing unang Prospero Pichay Birthday Cup “Battle of GMs” ug ingon man sa 1st Philippine Bullet Chess Championship nga parehong gipahigayon sa miaging bulan.

Ang labing unang Pinoy nga nakaabot og ELO rating nga 2600, si Paragua nakarepresentar sa Pilipinas sa World Chess Olympiad upat ka higayon niadtong  2002, 2004, 2006 ug 2012.

Si Qianyun nga miduwa na karon ubos sa Singapore Chess Federation, beterana sa World Team Chess Championship ug World Chess Olympiad veteran, samtang si Muminova maoy national champion sa Uzbekistan niadtong 2008 ug 2011 nga mirepresentar sa iyang nasud sa Women's World Chess Championship niadtong 2008 ug 2010.

Kadtong makapilde ni Paragua makadawat og P300 nga insentibo.

Sa kinatibuk-an, kapin sa P30,000 nga ganting salapi ang iapud-apod sa mga top finishers ning duha ka oras nga pinug-anay sa utok nga gipaluyohan sa Budde family sa Norway, Chess Infinitum Inc. ug Cebu Executives and Professionals Chess Association (CEPCA) ubos sa liderato ni Engr. Jerry Maratas.

Duna sa'y daghan nga raffle prizes alang sa mga entrante ug fans nga motan-aw sa mga duwa nga ipasalida sa live streaming pinaagi sa mga Facebook page sa Cebu School of Chess ug Chargemax Chess.

Ang entry fee nagkantidad og P100. Kadtong magparehistro lapas sa Hulyo 30 pabayron og P200.

Alang sa dugang detalye, kadtong mga interesado mahimong mokontak ni IM Kim Yap sa 0977-6864660 o sa m.me/kimsteven.yap.